Skip to content

Habari

Habari
Hifadhi

Risala na Barua

Matini
Hifadhi

Kumbukumbu na Simulizi

Kabla ya Mapinduzi
Baada ya Mapinduzi

Sauti na Taswira

Picha
Sauti
Video
Kiongozi Muadhamu Aonana na Washiriki wa Kongamano la Kitaifa la Vijana wenye Vipaji Chapa
14/10/2015
 Ayatullah Udhma Sayyid Ali Khamenei, Kiongozi Muadhamu wa Mapinduzi ya Kiislamu leo asubuhi (Jumatano) ameonana na hadhara ya wanafunzi wa Vyuo Vikuu wenye vipaji bora vya kielimu nchini na ametoa nasaha na tahadhari muhimu kwa watu wenye vipawa na viongozi nchini. Pia amesisitizia ulazima wa kuipa uzito wa hali ya juu taasisi ya watu wenye vipawa ikiwa ni taasisi ya kitaifa na ya kiistratijia na vile vile kuandaa uwanja wa kuchanua na kutoa msaada wa kielimu vijana hao wenye vipaji katika jamii. Aidha amesema, mashirika ya elimu za kimsingi ni moja ya nguzo kuu za uchumi wa kimuqawama na wa kusimama kidete. Ameongeza kuwa: Kutokana na baraka za malengo, kaulimbiu na harakati ya Mapinduzi ya Kiislamu katika jamii, na kushiriki kwa wingi vijana wenye vipawa katika medani tofauti na kuweko harakati adhimu na yenye kasi kubwa ya maendeleo ya kielimu na kitekonolojia ambayo imeanza nchini Iran, mustakbali wa nchi hii ni mustakbali bora ulio wazi, unaong'ara na ni mustakbali utakaokuwa na maendeleo, nguvu na uwshawishi mkubwa zaidi wa kimaanawi katika eneo la Mashariki ya Kati na duniani kwa ujumla na kwamba wale watu ambao wanajaribu kudhoofisha moyo wa vijana wa Iran na kuwakatisha tamaa kuhusu hali yao ya hivi sasa na mustakbali wao, wanafanya usaliti kwa nchi na kwa heshima na kwa matukufu ya taifa.
Mwanzoni mwa hotuba yake, Kiongozi Muadhamu wa Mapinduzi ya Kiislamu amesema kuwa, kuonana na vijana wenye vipawa, wenye misimamo na wenye nishati ni faraja sana kwake na kunazidisha matumaini moyoni na huku akiashiria namna vijana wa Iran walivyo werevu na walivyo na akili nyingi ikilinganishwa na wastani wa vijana wa mataifa mengine duniani ameongeza kuwa, kutokana na kwamba nguvu za Jamhuri ya Kiislamu ya Iran ni nguvu za dhati na kwa vile Iran inaamini kuwa ni yenyewe ndiyo inayopaswa kujiletea nguvu hizo na sio kutegemea wengine, vijana weledi wa mambo, wenye imani thabiti, wawajibikaji na wenye vipawa vya kila namna nchi, ni moja ya fursa bora na ni utajiri mkubwa kwa taifa.
Baada ya kutoa utangulizi huo, Ayatullah Udhma Khamenei ameanza kutoa nasaha kadhaa kama baba kwa vijana hao wenye vipaji. Amesema, kuwa na kipawa ni neema kutoka kwa Mwenyezi Mungu na nasaha yake ya kwanza kabisa kwa vijana hao ni kuwataka wamshukuru Mwenyezi Mungu kwa neema hiyo. Amewaambia vijana hao wenye ubora wa kielimu nchini kwamba: Kwa kuwa na vipaji vya namna hiyo; vijana wanapaswa kulihesabu suala hilo kuwa ni katika baraka za Mapinduzi ya Kiislamu kwani mapinduzi hayo matukufu yamewapa vijana wa Iran shakhsia bora, utambulisho na uthubutu wa kuingia kwenye medani za kila namna na hivyo kupata fursa ya kutumia vizuri uwezo na vipaji vyao vya dhati.
Ayatullah Udhma Khamenei amemeyataja mafanikio ya vijana wa Iran ya kutwaa nafasi na daraja bora za kielimu kati ya nchi mia mbili duniani kuwa ni matunda mengine ya Mapinduzi ya Kiislamu na kuongeza kwamba: Iran leo hii imefikia kwenye daraja ya juu ya kielimu katika hali ambayo katika kipindi chote hiki cha zaidi ya miongo mitatu iliyopita, imekumbwa na vizuizi mbali mbali kama vile vita vya kulazimishwa (vilivyoanzishwa na utawala wa zamani wa Iraq dhidi ya utawala mchanga wakati huo wa Jamhuri ya Kiislamu ya Iran), na muda wote huo imekuwa chini ya mashinikizo ya kila namna ya kisiasa na vikwazo vya kiuchumi.
Vile vile amewambia vijana hao wa Iran wenye vipawa kwamba: Nafasi hiyo bora ya kielimu, mumeipata kutokana na kuweko usalama na amani nchini, hivyo munapaswa kujua thamani ya watu wanaojitolea kila kitu chao kwa ajili ya kulinda usalama wa nchi na wa taifa lenu kama vile shahid Hamedani.
Kiongozi Muadhamu wa Mapinduzi ya Kiislamu ameyataja maziko ya shahid Hamedani yaliyofanyika kwa kufana na kwa kushiriki wimbi kubwa la watu na hususan katika mji wa Hamedan kuwa yanaonesha namna taifa la Iran linavyowathamini na kuwajali watu wanaojitolea katika njia ya kudhamini usalama wa nchi yao na kuongeza kuwa: Kama usalama utakosekana, utafiti na kazi zote za Vyuo Vikuu na maendeleo ya kielimu ya nchi nayo hayatakuwepo.
Kustahabu na kutanguliza mbele moyo wa jihadi mbele ya moyo wa maisha ya anasa na raha, ni nasaha ya pili iliyotolewa na Ayatullah Udhma Khamenei kama baba kwa vijana hao wenye vipawa.
Amesema, moja ya ugonjwa mkubwa wa watu wenye nafasi katika jamii ni kujiona bora mbele ya wengine na kusisitiza kuwa, hayo ni moja ya maradhi mabaya ya kinafsi ambayo inabidi mujiepushe nayo na msiruhusu kabisa yakukumbeni, na kwamba njia pekee ya kukabiliana na maradhi hayo ni kuimarisha moyo wa jihadi katika nafsi zenu na kufanya kazi kwa bidii na juhudi zenu zote kwa nia moja tu ya kutafuta radhi za Mwenyezi Mungu na kuhesabu kila kazi mnayoifanya kuwa ni wadhifa wenu wa kidini.
Kiongozi Muadhamu wa Mapinduzi ya Kiislamu amesisitiza kuwa, kushiriki katika pikiniki na safari za pamoja za kijihadi ni moja ya njia za kutia nguvu moyo wa kijihadi na kuongeza kuwa: Kushiriki kwenye pikiniki za kijihadi hupelekea kuwaelewa watu vizuri na kutambua vyema mashaka na matatizo yaliyopo katika jamii.
Ayatullah Udhma Khamenei amegusia pia uzoefu wake wa muda mrefu katika miaka ya baada ya ushindi wa Mapinduzi ya Kiislamu na namna baadhi ya watu wasivyotambua na wasivyojuwa matatizo yaliyopo katika jamii hususan katika maeneo ya vijijini na kwenye miji ya mbali na kusema kuwa, matatizo yanayowatesa watu wa familia maskini ni miongoni mwa mashaka, tabu na shida zilizopo katika jamii nchini na kusema kuwa, safari za watu kwa pamoja na pikiniki za kijihadi ni fursa nzuri kwa vijana kuweza kujua hali halisi ilivyo kwenye maeneo hayo na vile vile ni fursa nzuri ya kuweza kutoa huduma za moja kwa moja kwa wahitaji.
Vile vile amekosoa suala la kuendelea kuwepo pikiniki na safari za pamoja za kuelekea katika baadhi ya nchi za Ulaya licha ya maonyo yaliyotolewa huko nyuma na kusisitiza kuwa: Safari za namna hiyo ni moja ya mambo mabaya na ghalati kabisa, na kwamba pikiniki za kijihadi ni bora mno na ni za heshima zaidi, kuliko safari hizo za kwenda barani Ulaya.
Katika nasaha zake za tatu, Kiongozi Muadhamu wa Mapinduzi ya Kiislamu amewausia vijana wenye vipaji kubakia nchini na kutokubali kukumbwa na wimbi la kuhama nchi na kukimbilia kwenye nchi ambazo watakuwa wageni maisha yao yote na badala yake amewataka wawe mstari wa mbele katika kulijenga taifa lao na kuleta mfumo sahihi wa usalama nchini na kujenga mwili mzuri ulio imara na salama kila upande wa jamii yao.
Ayatullah Udhma Khamenei amegusia matatizo na shida zilizopo nchini licha ya kuwepo maendeleo na uwezo wa kila namna na kuongeza kuwa: Kubakia nchini na kufanya bidii za kuondoa shida na matatizo yaliyopo na kuwa chanzo cha kuwa na nafasi nzuri jamii na kuwaletea fakhari na heshima watu wa jamii hiyo ni jambo muhimu mno kwa vijana hao wenye vipaji.
Kutokubali kurubuniwa na Wamagharibi ni nasaha za nne za Kiongozi Muadhamu wa Mapinduzi ya Kiislamu kwa vijana wenye vipawa bora vya kielimu nchini na amelitolea ufafanuzi zaidi suala hilo akisema: Ijapokuwa wamagharibi wamepiga hatua kubwa katika upande wa sayansi na teknolojia, lakini si sahihi kukubali kurubuniwa na jambo hilo kwani nguvu na uwezo wa dhati wa vijana wa Kiirani ni mkubwa sana na amesema, kama mtu ataamua kulinganisha hali ya Iran na maeneo mengine, basi inabidi alinganishe baina ya kipindi cha zaidi ya miongo mitatu iliyopita ya baada ya ushindi wa Mapinduzi ya Kiislamu nchini Iran na zaidi ya kipindi cha miongo mitatu ya nchi nyingine, baada ya nchi hizo kupata uhuru au kufanya mapinduzi.
Ayatullah Udhma Khamenei amesisitiza kuwa: Kizazi cha hivi sasa cha vijana kinaweza kujiletea fakhari za maendeleo na kupiga hatua kubwa za ustawi wa kielimu na kuimarisha misingi ya kujitegemea kielimu nchi yao kwa heshima na fakhari kubwa.
Baada ya hapo ameanza kutoa nasaha kuhusiana na uongozi na usimamiaji wa mambo kwa viongozi nchini na pia kwa vijana wenye vipaji, kwa kusisitizia ulazima wa kuipa umuhimu na uzito wa hali ya juu taasisi ya watu wenye vipaji nchini. Ameongeza kuwa: Taasisi ya watu wenye vipawa ni taasisi ya kitaifa na ni taasisi ya kiistratijia hivyo si sahihi kuviachia Vyuo Vikuu tu kuendesha taasisi muhimu kama hiyo.
Kiongozi Muadhamu wa Mapinduzi ya Kiislamu vile vile ameitaka taasisi ya watu wenye vipaji nchini Iran kuwa na mipangilio mizuri na ya kina kwa ajili ya kuandaa uwanja kwa ajili ya kudhihiri na kujitokeza kivitendo uwezo na vipaji bora vya vijana nchini. Amesisitiza kuwa: Inabidi vijana wenye vipaji waandaliwe mazingira mazuri ya kazi na kuhisi kuwa wana manufaa na faida kubwa kwa jamii na kuwashawishi wabakie nchini na waondokane na fikra za kukimbilia nje.
Ayatullah Udhma Khamenei ametaja baadhi ya hatua muhimu zinazopaswa kuchukuliwa na watu wenye vipaji kwa ajili ya kuendelea na harakati ya kielimu nchini Iran kuwa ni pamoja na kusahilishwa mchakato mzima wa masomo wa watu wenye vipawa, kupanuliwa na kustawisha mwenendo wa kuunda mashirika mbali mbali ya elimu za kimsingi, kuanzishwa vitengo mbali mbali vya kielimu katika Vyuo Vikuu kwa kuwapa kipaumbele wahadhiri wakubwa wa vyuo hivyo, wahadhiri wenye itikadi madhubuti za kidini na wanamapinduzi. Amesisitiza kuwa inabidi watume walimu wa Vyuo Vikuu ambao wana itikadi ya kujenga na kustawisha mustakbali bora wa Iran, wenye uchungu wa nchi na wanaoshikamana na matukufu ya Mapinduzi ya Kiislamu.
Vile vile ameitaka taasisi ya watu wenye vipawa nchini Iran kufuatilia kwa karibu na kwa mtawalia matunda na matokeo ya kazi mbali mbali zinazofanyika nchini na huku akiashiria suala la uchumi wa kimuqawama na wa kusimama kidete amesema: Moja ya njia za kufanikisha siasa za uchumi wa kimuqawama na ambayo ilitangazwa tangu mwanzoni kabisa mwa harakati za uchumi huo na kuungwa mkono na wanafikra nchini, ni kuyasaidia na kuyaunga mkono mashirika ya elimu za kimsingi na kuwa na ratiba na mipango maalumu ya kufanikisha jambo hilo.
Vile vile Kiongozi Muadhamu wa Mapinduzi ya Kiislamu ameashiria kwa haraka haraka nukta nyengine moja kuhusiana na uchumi wa kimuqawama akisema: Kuhusu namna ya kuendesha na kuendeleza siasa za uchumi wa kimuqawama na wa kusimama kidete, hivi sasa muda hauruhusu kulizungumzia suala hilo, lakini mimi siridhishwi na kasi ya hivi sasa ya utekelezaji wa siasa hizo.
Baada ya kubainisha nukta hiyo, Ayatullah Udhma Khamenei amezungumzia ulazima wa kuweko mpango makini wa kuwezesha kutumiwa vizuri uwezo wa mashirika ya elimu za kimsingi kwa ajili ya kufanikisha siasa za uchumi wa kusimama kidete na kuongeza kwamba: Ninatoa pendekezo kwamba maudhui ya moja ya vikao vyangu na vijana wenye vipaji iwe ni maalumu kwa ajili ya kujadili namna vijana hao wanavyoweza kutoa michango yao katika uchumi wa kimuqawama, ili kuweze kuandaliwa mpango maalumu wa kitaifa wa kuweza kustafidi vizuri na fikra na elimu ya vijana hao.
Vile vile amesema kuwa, suala la kutafuta na kulea vipaji bora katika shule za msingi na za elimu ya kati kuwa ni suala muhimu sana na huku akiashiria mpango uliopewa jina la "Shehab" katika Wizara ya Elimu na Malezi ya Iran amesema: Waziri wa Elimu na Malezi anapaswa kusimamia yeye mwenyewe utekelezaji wa mpango huo na kuufanyia uchunguzi wa kina na asiruhusu mpango muhimu kama huo kudharauliwa na kutothaminiwa.
Kiongozi Muadhamu wa Mapinduzi ya Kiislamu ameendelea na hotuba yake kwa kutoa onyo kuhusu mambo kadhaa. Onyo la kwanza limehusiana na watu ambao wanatumia magazeti, majarida, majukwaa na mimbari kufanya kampeni za kuwakatisha tamaa muda wote wananchi na vijana na kukanusha maendeleo ya kila namna ya kielimu na mafanikio makubwa kiasi chote hiki ya Iran.
Kiongozi Muadhamu wa Mapinduzi ya Kiislamu amewataka viongozi nchini kuwa macho na kuwa makini kuhusu watu wa namna hiyo na kusisitiza kwamba: Maendeleo ya kustaajabisha ya kielimu ya Iran katika nyuga za Nano, seli shina na teknolojia ya nyuklia si ndoto, bali ni uhakika ambao unajulikana wazi dunia nzima. Hivyo kitendo cha kuwakatisha tamaa vijana na kukanusha harakati adhimu na yenye kasi kubwa ya kielimu na kiteknolojia ya taifa la Iran, ni usaliti kwa nchi na kwa heshima na kwa matukufu ya taifa.
Ayatullah Udhma Khamenei amegusia pia mrengo wa watu ambao wanawatafuta watu wenye vipaji vya kielimu nchini na kuwashawishi waikimbie nchi na kuhamia nchi nyingine na kuwataka viongozi kuwa macho mbele ya mrengo huo. Aidha amesema: Tahadhari yangu nyengine inahusiana na baadhi ya viongozi, baadhi ya wakuu na baadhi ya wahadhiri katika Vyuo Vikuu wanaokabiliana na watu waumini, wanamapinduzi na walioshikamana vilivyo na mafundisho ya kidini kwamba mawaziri wanapaswa kuwa macho kikamilifu kuhusu kadhia hiyo na wasiruhu jambo hilo kutokea.
Katika sehemu ya mwisho ya hotuba yake, Kiongozi Muadhamu wa Mapinduzi ya Kiislamu ametoa muhtasari wa hotuba yake na kusema kuwa, mimi nina ushahidi kamili ninaposema nina matumaini mazuri kuhusu mustakbali bora wa Iran.
Vile vile ameashiria namna kundi kubwa la vijana nchini Iran linavyohisi kwamba ni jukumu lao kulitumikia taifa na nchi yao na kusema kuwa, sehemu kubwa ya vijana hao ni wale wenye vipaji vya kila namna. Aidha amegusia kuendelea kuwa hai malengo, kaulimbiu, nara na harakati ya kimapinduzi katika jamii ya Iran na kusema: Hilo ndilo jambo kuu linalowafanya maadui wa taifa la Iran wakumbwe na hamaki za kila namna, na kwa msingi huo ndio maana utawasikia wanasema, itakuwa ni jambo gumu sana kukabiliana na Iran madhali kaulimbiu za Mapinduzi ya Kiislamu zingalipo nchini humo.
Ayatullah Udhma Khamenei ameongeza kuwa: Hivi sasa kaulimbiu na malengo ya Mapinduzi ya Kiislamu yako hai katika jamii ya Iran kiasi kwamba hata baadhi ya watu wasioshikamana na kaulimbiu hizo wanalazimika kujionesha kidhahiri kuwa nao wamo kwenye kaulimbiu hiyo na Mapinduzi ya Kiislamu yanazidi kusonga mbele kwenye njia yake iliyonyooka, na jambo hilo ndilo linaloyapambanua Mapinduzi ya Kiislamu ya Iran na mapinduzi mengineyo duniani.
Vile vile amesisitiza kuwa: Madhali harakati na fikra ya Mapinduzi ya Kiislamu nchini itaendelea kuwepo, maendeleo, ustawi na nguvu za Iran zitaendelea kuongezeka siku hadi siku na kuzidi kuwa na nafasi ya juu katika ushawishi wa kiroho na kimaanawi katika eneo la Mashariki ya Kati na nje ya eneo hili.
Kabla ya hotuba ya Kiongozi Muadhamu wa Mapinduzi ya Kiislamu, Dk Sattari, Makamu wa Rais wa Jamhuri ya Kiislamu ya Iran katika masuala ya sayansi na tekenolojia ambaye pia ni mkuu wa taasisi ya taifa ya watu wenye vipawa nchini Iran ametoa hotuba fupi na kusema kuwa, kipaumbele kikuu cha leo hii nchini ni kuipa mazingatio makubwa elimu na teknolojia. Ameongeza kuwa: Iran hivi sasa inawahitajia sana watu wenye vipaji vya kila namna ambao kwa kujiamini na kwa kufanya kazi kwa bidii, wanaweza kuiletea nchi mafanikio makubwa katika nyuga zote nyengine kama walivyofanya katika nyuga za teknolojia ya "Nano na Bio" (Nanobioteknolojia).
Makamu huyo wa Rais wa Iran katika masuala ya sayansi na teknolojia amebainisha pia kuwa, watu wenye vipaji wana deni kubwa kwa nchi yao na kuongeza kuwa: Hatupaswi baada ya kuondolewa vikwazo, kuifanya nchi yetu kuwa soko tu la matumizi ya bidhaa zinazotoka nje ya nchi, bali tunapaswa kuhakikisha kuwa, tunazalisha wenyewe teknolojia za kila namna ili kwa njia hiyo tuweze kuongeza utajiri wa nchi yetu kupitia uzalishaji wa elimu.
Dk Sattari amesisitiza pia kwamba kuna wajibu wa kuingia sekta binafsi katika uwanja wa utafiti kama ambavyo kuna udharura kwa kuweko uwekezaji katika fikra na ubunifu wa watu wenye vipawa na kuongeza kuwa: Kuongezeka nishani za ubora wa kimasomo wanazopata wasomi wa Iran, kuupa kipaumbele utafiti wa masuala ya kimsingi, kutekeleza mpango wa Shehab, kuviunga mkono na kuvisaidia vitengo vya utafiti vya wanafunzi wa shule za msingi, kupanua wigo wa kazi za watu wenye vipawa na kulipa umuhimu mkubwa suala la udiplomasia wa kiteknolojia, ni miongoni mwa hatua muhimu zilizochukuliwa na Idara ya Sayansi na Teknolojia ya Ofisi ya Rais wa Jamhuri ya Kiislamu ya Iran na taasisi ya taifa ya watu wenye vipaji nchini.
 
< Nyuma   Mbele >

^